"Rusiyä bezneñ öçen kisken yanaw"

AQŞ saqlanu ministrı Lloyd Ostin Amerika saqlanu strategiyäseneñ Rusiyäne “kisken yanaw” bularaq bilgeläwen belderde. Ul Milli saqlanu strategiyäse dokumentı çıqqannan soñ Pentagonda matbuğat cıyılışı oyıştırdı.

Rusiyäneñ Ukrainada taktik atom-töş qoralı qullanu mömkinlegenä bäyle sorawğa cawap birgändä Mäskäw idaräseneñ bu yünäleştä adım yasawınıñ xalıqara säyäsätne üzgärtäçägen assızıqladı. “Şuña kürä başınnan birle äytep kildek: ägär mondıy xäl bulsa, xalıqara cämäğat’çelektän bik ähämiyätle cawap kiläçäk,”-dide ul.

Monnan tış, Aq Yort milli iminlek şurası strategik êlemtä mödire Djon Kirbi da Rusiyä AQŞnıñ grajdanlı iyärçennärenä bärsä, tüläyäçägen belderde. Ul Zoom platforması aşa uzdırğan matbuğat cıyılışında Aq Yort jurnalistlarına AQŞ tışqı säyäsäte turında bäyälämälären citkerde.

Bilgele bulğança, Rusiyä tışqı êşlär ministrlığı wäqalätlese Konstantin Voronśov BMO ğomum şurasında, AQŞ Ukrainağa yärdämen däwam itsä, grajdanlı iyärçennärne nişanğa alaçaqların äytkän ide. Älege belderügä reakśiyä xaqında Kirbidan da soradılar.

“Ukrainağa yärdämnärebezne ğayät’ açıq häm samimi räweştä alıp baraçaqbız. Bezneñ bu poziśiyäne berni dä üzgärtä almıy. Barı şunı ğına äytä alam - AQŞ asqormasına qarata teläsä-qaysı höcüm öçen tüläyäçäklär,”-dide Kirbi.