Ukrainada İran qoralları qullanıla

AQŞta Aq Yort milli iminlek şurası strategik êlemtä mödire Djon Kirbi İran xärbi xezmätkärläreneñ Rusiyäneñ Kiyevnı bombalawında yärdäm kürsätüen belderde. “İran xäzerge waqıtta suğış qırında, bäreleşlärdä turıdan-turı qatnaşa,”-dide ul.

Djon Kirbi Zoom aşa ütkärgän brifingta AQŞ tışqı säyäsäte belän bäyle belderülär yasadı. Ul inde küptän Rusiyäneñ İrannan dron aluı turında kisätü yasawların xäterlätte.

“Rusiyä İrannan alğan keşesez hawa apparatların Qırımğa cibärde. Bez Qırımda urnaşqan Rusiyä xärbiläreneñ İran pilotların qullanuın häm alar yärdämendä Kiyevqa höcüm itülären raslıybız. İran ğaskäriläreneñ Qırımda buluın häm bu operaśiyälärdä Rusiyägä bulışuın beläbez,”-dip söyläde Djon Kirbi.

Ul Rusiyäneñ bügengä qadär İrannan distälägän keşesez hawa apparatları aluın häm bu täêminatnıñ däwam itäçägen citkerde.  “Monnan tış, suğış kiräk-yaraqlarına qıtlıq kiçerüçe Rusiyäneñ kiläçäktä İrannan “cirdän cirgä” raketa şikelle ğadäti qorallar satıp ala başlayacağın uylıybız,”-dide ul.  

Djon Kirbi İranda yasalğan keşesez hawa apparatlarınıñ Ukrainada xärbi häm sivil maqsatlarğa qarşı qullanıluın äytte. Bilgele bulğança, İran da, Rusiyä dä dron turındağı süzlärne kire qağa. “Bu illär böten dön’yağa yalğan söyli ala, tik çınbarlıqnı yäşerä almayaçaqlar,”-di Kirbi.

Ukraina däwlät başlığı Volodimir Zelenskiy da Rusiyä köçläreneñ ilenä höcümnärdä İranda çığarılğan dronnar qullanuın äytte. Ul İrannı cinayät’kä äşnälek itüçe dip atadı häm monı isbatlaw öçen êşçänlek alıp baruların belderde.