Awrupa liderları Pragada oçraşa
Anda Awrupa Berlegennän kiñräk yaña berläşmägä nigez salınaçaq
Awrupa qıytğasındağı däwlätlärneñ liderları Çexiyä başqalası Pragada cıyıla. Anda berençe tapqır Awrupa säyäsi cämäğat’çelege utırışı uzaçaq. Çarağa 27 Awrupa Berlege ilennän tış aña kermäwçe tağın 17 däwlät çaqırılğan. Utırışta Türkiyä ilbaşı Räcäp Tayyip Ärdoğannıñ da qatnaşuı kötelä.
Awrupa Berlege bulmağan illärdän, Türkiyädän tış, Angliyä, Norvegiyä, Ukraina, Albaniya, Azärbaycan, Ärmänstan, Bosniya-Gerśegovina, Gruziya, İslandiya, Kosovo, Lixtenşteyn, Moldova, Qarataw, Tön’yaq Makedoniya, Serbiyä häm Şveyśariyä çaqırulı.
Awrupa säyäsi cämäğat’çelege fikeren Franśiyä ilbaşı Êmmanuêl’ Makron may ayında beldergän ide. Anıñ täq’dime Awrupada tağın da kiñ säyäsi berläşmäne buldırunı küzallıy. Ul yaña xalıqara oyışma tügel, säyäsi fikerläşü platforması bularaq uylanıla.
Utırışta Rusiyäneñ 24nçe fevral’dä başlağan höcümnärennän soñ Ukrainağı wäzğıyät’, suğışnıñ täêsire, Awrupa qıytğasında iminlek häm totrıqlılıq, ênergetika, iq’tisad, säwdä, transport, sankśiyälär, asqorma şikelle bik küp mäs’äläne kütärü planlaştırıla.
Paltformanıñ 6 ayda ber liderlar däräcäsendä oçraşuı kötelä. Berençe utırışta Ukraina däwlät başlığı Volodimir Zelenskiy videoêlemtä aşa qatnaşaçaq.
