İranda protestlar tınmıy

İrannıñ başqalası Tähranda Mäxsa Äminineñ ülemennän soñ başlanğan rizasıqlıq çaralarında qatnaşuçı studentlarğa poliśiyä qarşılıq kürsätte.

İran mediasına qarağanda, San'at-ı Şerif universitetında kiçä tönlä demonstrśiyägä çıqqan yözlärçä student soñğı waqıyğalarda qulğa alınğan iptäşläreneñ irekkä cibärelüen taläp itte. Alarnıñ xakimiyätkä qarşı şiğar’lär qıçqıruınnan soñ uqu yortın äyländerep alğan iminlek köçläre küz yäşe çığaruçı gaz sipte.  

Studentlarnıñ rizasızlıq çarasına teläktäşlek kürsätergä teläwçe tähranlılar texnikaları belän Azadi uramına barıp konvoyğa tezelde.

Kiçäge waqıyğalarda distälärçä student qulğa alınğan, uquçılar universitet kampusınnan çığarılğan häm uqu yortında däreslär waqıtlıça tuqtatılğan.

İldä Mäxsa Äminineñ ülemennän soñ başlanğan rizasızlıq çaralarınıñ kiçä 16nç köne ide. Bik küp şähärdä protestlar däwam itkän arada iminlek köçläre qulğa alu häm totqarlawlar dulqının başlap cibärde. Anda ictimağıy tärtipne qurqınıç astına quyu säbäpçe itep kürsätelä. Yaqınça 2 meñ keşeneñ saq astında buluı farazlana. Alar arasında studentlar, tanılğan şäxeslär häm jurnalistlar bar.

İsegezgä töşeräbez, başın qaplaw qağıydälären ütämäwe öçen qulğa alınğan 22 yäş’lek qız Mäxsa Äminineñ 16nçı sentyabr’dä ülüe İranda rizasızlıq çaraların kiterep çığardı.

İran däwlät telekanalı protestlar waqıtında 41 keşeneñ ğomere özelüe turında söyli. Alar arasında iminlek köçläre dä bar.