İlon Mask İranğa internet birde

AQŞ iranlılarğa birelüçe internet xezmäteneñ külämen kiñäytügä röxsät itüçe liśenziyä çığardı. Şunnan soñ İlon Mask iyärçenle internet sisteması Starlinknı İranda aktivlaştırdı.

AQŞ däwlät särqatibe Êntoni Blinkennıñ älege mäs’älä belän bäyle Twitter yazmasına cawap itep Mask: “Starlinknı êşlätep cibäräbez” dide.  

AQŞ finans ministrlığınnan yasalğan belderüdä älege ğomumi liśenziyäneñ İranda internet iregenä yärdämne arttıru maqsatınnan çığarıluı äytelde.

İranda, Mäxsa Aminineñ başnı yabu qağıydälären ütämäwe öçen qulğa alınuınnan soñ ülüe näticäsendä rizasızlıq çaraları başlanğaç, xökümät internetnı çikläde. Amerika isä İran xalqınıñ irekle mäğ’lümat ağışı häm çınbarlıqqa tayanuçı xäbärlärgä ireşü xaqların yaqlaw öçen xäräkät itüen belderde.

Starlink - SpaceX şirkäteneñ citärlek internet xezmäte bulmağan noqtalarda bötendön’ya çeltärenä quşılunı ciñelläşterüçe sistema. Kiläçäktä Cir orbitasın 12 meñ Starlink iyärçene belän äyländerep alırğa uylıylar. Proyekt 2027nçe yılda tögällänäçäk.