Rusiyädä öleşçä mobilizaśiya iğ'lan itelde / Русиядә өлешчә мобилизация игълан итeлдe

Rusiyä däwlät başlığı Vladimir Putin ildä öleşçä mobilizaśiyanı küzdä totuçı qararnamä imzaladı.

Putin il xalqı häm Ukrainanıñ könçığışındağı üz-üzlären iğ’lan itkän Doneśk häm Lugansk cömhüriyätläre belän Xerson häm Zaporoj’ye töbäklärendä yäşäwçelärgä möräcäğat’ itep çığış yasadı. Anda ul öleşçä mobilizaśiyä xaqında citkerde.

Putin çığışında öleşçä mobilizaśiyäneñ bügennän başlanacağın assızıqladı. Anıñ äytüençä, Könbatış suveren, bäysez üseş üzäklären bastırırğa, Rusiyäne yuq itärgä mataşa. “Ägär bezneñ territorial’ bötenlegebez qurqınıç astında bulsa, Rusiyä barlıq mömkinleklärne qullanaçaq, bu buş yanaw tügel,”-dide ul.

“Barı xäzerge waqıtta zapasta bulğan häm monnan alda armiyädä xezmät itkän, bilgele xärbi belgeçleklär häm täcribägä iyä watandaşlar öleşçä mobilizaśiyägä kerä. Xärbi xezmätkä çaqırıluçılar berleklärgä cibärelgänçe, maxsus xärbi xäräkät täcribäse isäpkä alınıp, östämä öyräteläçäk,”-dip söyläde Putin.

Şul uq waqıtta Rusiyä liderı Könbatışnıñ Ukrainağa cibärgän qoralların centekläp tikşerergä häm tiz, êffektiv räweştä Rusiyä qoralların yañartırğa kürsätmä birde.

Putin Rusiyä saqlanu sänäğate idaräçeläre belän Kreml’dä uzdırğan oçraşuda tarmaqnıñ, ildäge wäzğıyät’, awırlıq häm yanawlarnı küz uñında totıp, tığız êşçänlek alıp baruın belderde. Ul Ukrainadağı rus berleklären qoral, xärbi cihaz häm kiräk-yaraq belän täêmin itüne qarap çığaçaqların citkerde. Putin äytüençä, Ukrainadağı “maxsus operaśiyä”dä Rusiyä qoralları yuğarı näticälelek kürsätä.

“Kiyevtağı xäzerge rejimnı yaqlaw öçen böten NATO arsenalı diyärlek cibärelä. Bu bezgä qarşı qullanılğan häm anda bulğan qorallarıbıznı centekläp tikşerü, mömkinleklärebezneñ sıyfatın arttıru häm alğan täcribädän çığıp texnikabıznı, qorallarıbıznı yaxşırtu kiräklegen añlata. Bu prośess normal’ häm qullanılırğa tiyeş. Bu mömkin bulğança tiz häm näticäle räweştä êşlänergä tiyeş,”dip söyläde Putin.