Trampnıñ öyendä yäşeren dokumentlar tabılğan

AQŞnıñ êlekkege ilbaşı Donal’d Trampnıñ Floridadağı öyenä yasalğan FBİ basqını waqıtında qulğa töşerelgän dokumentlar arasında çit il xökümäteneñ xärbi saqlanu häm atom-töş qorallanuına bäyle mäğ’lümatlar da barlığı açıqlandı.

“Washington Post” gazetı kompetenśiyäle çığanaqlarğa tayanıp yazğan xäbärendä älege il häm anıñ AQŞ belän berlektäşme-tügelme ikänlege turında mäğ’lümat birmi.  

FBI 8nçe avgustta êlekkege AQŞ ilbaşınıñ öyendä tentü ütkärep 11 meñnän artıq räsmi dokument häm fotoräsem qulğa töşerde. Alarnıñ ber öleşe barı yäşeren genä tügel, xätta kürü öçen maxsus röxsät taläp itüçe - AQŞ operaśiyäläre belän bäyle ütä dä yäşeren mäğ’lümatqa iyä.

AQŞ yustiśiyä ministrlığı Trampnı 2021nçe yılnıñ ğıynvarında Aq Yorttan kiteşli üze belän räsmi dokumentlar alıp çığuda häm torağında yäşerüdä ğayepläp tikşerü alıp bara.