Teşli torğan balıqlar päyda buldı

Franśiyäneñ kön’yaq häm könbatış töbäklärendä yanğın panikası däwam itkän arada, Franśuz riv’yerası häm Breton’ arasındağı yar buylarında “teşli torğan balıqlar”dan qurqu başlandı.

İl matbuğatındağı xäbärlärgä qarağanda, yal itüçelär küp kenä plyajda diñgezgä kergändä teşläw xis itüläre turında şiqayät’ belderä.

Tikşerenülär näticäsendä Tön’yaq Amerikadan çıqqan çotira balığınıñ bu cirleklärdä päyda buluı häm keşelärne teşläwe açıqlana.  

“Le Parisien” gazetı bu balıqlarnıñ klimat üzgärü arqasında Franśiyä yarlarına yünälüen citkerä.

Okeanolog Paskal’ Romans “France 3” telekanalına interv’yusında çotiranıñ qızıqsınuçan, territorial’ balıq buluına häm keşelärdän qurıqmawına iğ’tibarnı cälep itä. “Ägär borçısañ, höcüm itär häm awğa çıqsa, här närsäne, xätta keşelärne tatıp qarawdan tayçınmas,”-dip söyli belgeç.

Romans äytüençä, su cılılığınıñ artuı bu balıq töreneñ metabolizmın üzgärtkän. Ul ürçü çorınıñ cäygä turı kilüe häm oyaların saqlaw intuiśiyäse säbäple çotiranıñ tağın da agressivlaşa aluın belderde. Xätta: “Qaçığız, yuqsa, sezgä yabışır, cibärmäs,”-dip kisätte.