Tön'yaq Koreya liderı Kovid-19nı ciñülären belderde

Tön’yaq Koreya liderı Kim Çen In koronavirus kizüen ciñülären belderde. Ul böten dön’yada Kovid-19 xakimlek itkän çorda 2 yıl buyı ilendä älege çirneñ kürenmäwen alğa sörde. Tik 12nçe mayda ğına Tön’yaq Koreya berençe yoqtıru oçrağın räsmi bularaq rasladı.

Kim Çen In kizüne kontrol’gä aluda tırışlıq quyğan mediśina xezmätkärläre belän oçraşıp, ciñügä öleş kertüçelärne qotladı. Ul alarnı “cannarın qızğanmıyça ilneñ häm xalıqnıñ iminlegen fidakyarlarça yaqlağan batır front suğışçıları” dip atadı.

Kim Tön’yaq Koreyadağı sośial’ sistemanıñ dön’yada iñ yaxşısı buluın citkerde. Şul säbäple ul keşe tormışınıñ ışanıçlı saqçılarınnan küp närsä kötülären dä östäp äytte.

Kim Çen Innıñ qız tuğanı, Koreya Êşçelär partiyäse üzäk komitetı räise urınbasarı Kim Yo Çjon çirneñ Kön’yaq Koreya çigennän şarlar belän cibärelgän broşyuralar häm çit matdälär arqasında kerüen alğa sörä. Ul, ägär Seul moña çik quymasa, üç alu belän yanıy.

Kim Yo Çjon abıysınıñ kizü belän köräştä üz-üzen ayamawın maqtap telgä ala. Anıñ äytüençä, Kim Çen In, üze virus êläktergän xäldä dä, êşläwdän tuqtamağan. “Yuğarı temperatura belän awır xäldä buluına qaramastan, ber mizgel dä yal itmiçä üz cawaplılığındağı keşelär turında uyladı,”-di ul.

Tön’yaq Koreya berençe awırtu oçrağın räsmi bularaq 12nçe mayda terkäde, ä 29nçı iyül’dän inde däwlät mediası ildä “şöbhäle oçraq” kürelmäwen belderde.

İldä citärlek däräcädä Kovid-19 testları yuq, şuña kürä çın sannarnı belü mömkin tügel dip uylanıla. Anda däwlät 4 million 77 meñ yoqtıru oçrağın rasladı. 12nçe maydan birle koronavirustan 74 keşeneñ ülüe belderelde.