Rusiyä xalıqara ğaläm stanśiyäsennän kitä

Rusiyä federal’ ğaläm agentlığı Roskosmos räise Yuriy Borisov ileneñ 2024nçe yıldan soñ Xalıqara ğaläm stanśiyäse proyektınnan çığaçağın belderde. Ul başqala Mäskäwdä däwlät başlığı Vladimir Putin belän uzdırılğan cıyılışta bu xaqta söyläde.

Borisov 2024nçe yılğa qadär Rusiyäneñ älege proyektta burıçların ütäwen däwam itäçägen assızıqladı. Roskosmos citäkçese äytkänçä, il üzenä ayırım orbital’ stanśiyä töziyäçäk.

AQŞnıñ aviaśiyä häm ğaläm agentlığı NASAnıñ başlığı Bill Nel’son 4nçe iyül’dä yasağan belderüendä Amerika belän Rusiyä arasında Xalıqara ğaläm stanśiyäsendäge xezmättäşlekneñ ob’yektnıñ 2030nçı yılda missiyäsen tögälläwenä qadär däwam itüenä ömetlänüen äytkän ide.