Koronavirus oçraqları arta bara

Dön’yada koronavirus oçraqları 5 atna buyı üseştä. 2022nçe yılnıñ martınnan soñ kimegän kürsätkeçlär iyün’neñ ikençe yartısınnan başlap qabat arta.

Bötendön’ya sälamätlek saqlaw oyışmasınıñ atnalıq xisabına qarağanda, uzğan atnada dön’ya külämendä 5,7 million Kovid-19 oçrtağı terkälgän. Bu, annan aldağı atna belän çağıştırğanda, 6%qa kübräk.

Artunıñ Omikron variantının tiz yoğuçan BA.4 häm BA.5 törläre taralu arqasında kilep çığuı farazlana.

Şul uq waqıtta Bötendön’ya sälamätlek saqlaw oyışması virusqa bäyle ülemnärdä üseş küzätelmäwen belderde. Uzğan atnada 9 meñ 800 keşeneñ ğomere özelgän. Älege san annan aldağı atnadan ällä-ni ayırılmıy.

Regional’ bularaq qarağanda, yoqtıru oçraqlarında iñ küp artu Könbatış Tın okean häm Yaqın Könçığışta terkälä.

AQŞnıñ awırularnı kontrol’dä totu häm profilaktikalaw üzägennän belderülärençä, Omikronnıñ BA.4 häm BA.5 subvariantları awıru oçraqlarınıñ 80%ınnan kübrägen täşkil itä.  

Üseş däwam itsä, közge aylarda dön’ya külämendä yaña kizü dulqını çığa aluı küzallana.

Bötendön’ya sälamätlek saqlaw oyışması ğomum särqatibe Tedros Adxanom Gebreyesus uzğan atnada yasağan belderüendä Kovid-19nı “global’ ğadättän tış xäl” bularaq bilgeläwlären däwam itülären äytte.

Süz uñayınnan, İran sälamätlek saqlaw ministrı Bäxram Äynullaxi ildä koronavirus kizüeneñ 7nçe dulqını başlanuın belderde. Ul xalıqnı vakśina yasatırğa, küp keşele häm yabıq urınnarda bitlek kiyärgä çaqırdı.

İran sälamätlek saqlaw ministrlığı beldergänçä, ildä soñğı 24 säğat’tä Kovid-19dan 13 keşeneñ ğomere özelgän, 5 meñ 751 yaña oçraq terkälgän. Belgeçlär 516 keşeneñ xäleneñ awır buluın, 656 awırunıñ xastaxanägä salınuın citkerde.  

İranda 2020nçe yılda koronavirus kizüe başlanğannan birle 141 meñ 499 keşe ülde, 7 million 278 meñ 478 keşe älege virusnı yoqtırdı.