İtaliyädä boz astında qaluçılarnı êzläw däwam itä

Al’p tawlarınıñ İtaliyä yağında qalğan Marmolada qalqulığında boz qatlamınıñ işelüe näticäsendä barlıqqa kilgän hälakättä ülüçelärneñ sanı 9ğa citte.

ANSA agentlığınıñ xäbärendä äytelgänçä, êzläw-qotqaru törkemnäre tawda waqıyğa urınında qayber qaldıqlarnı çığara häm, şulay itep, ülüçelär sanı arta.  

Tabılğan qaldıqlarnıñ 3nçe iyül’däge hälakät waqıtında cirlektä bulğan al’pinistlarnıqımı ikänen tögäl äytä almıylar. Monı açıqlaw kötelä. Êzläw-qotqaru êşçänlege dä däwam itä. Waqıyğada yaralanuçılarnıñ sanı -7.

Kanaśey mêrı Djovanni Bernard, Marmolada qalqulığındağı hälakättän soñ, tawda yaña boz işelü, qar taşqını şikelle küreneşlär bulu qurqınıçı säbäple qayber xätär noqtalarğa kerüne tıydı.

İtaliyä matbuğatı waqıyğa mizgelendä tawda bulğan keşe sanın 20 belän 30 arasında dip yaza.  

İsegezgä töşeräbez, İtaliyäneñ tön’yaq-könçığışında Marmolada qalqulığında 3nçe iyül’dä boz qatlamı işelde. Şunda bulğan ber törkem al’pinist hälakätneñ näq’ urtasında qaldı

İtaliyädä küpmeder waqıt çiktän tış êsselär xakimlek itä. Marmolada qalqulığında 2nçe iyül’dä cılılıq +10 gradus bula. Bu älege tawda moña qadär kürelgän iñ yuğarı temperatura.

Wäqalätlelär İtaliyädäge iñ zur boz qatlamnarı bulğan Marmolada qalqulığında 15-30 yıl êçendä global’ cılınu säbäple hiç boz qalmayaçağı turında kisätä.