Rus köçläre Lisiçanksnı kontrol' astına aldı

Rusiyäneñ Saqlanu ministrı Sergey Şoygu rus köçläreneñ Ukrainanıñ Lisiçansk şähären tulısınça kontrol’ astına aluın belderde.

Saqlanu ministrlığınnan yasalğan yazma açıqlawğa kürä Şoygu Rusiyä däwlät başlığı Vladimir Putinğa rus armiyaseneñ Ukrainadağı ğamälläre belän bäyle mäğlümat birde.

Ministr Şoygu rus köçläreneñ Ukrainanıñ Lugansk töbägendä alğa baruların belderep: “Lisiçansk şähäre belän Belogorivka, Novodrujesk, Maloryazanŝevo häm Beşaya Gora toraq punktlarında tulısınça kontrol’ urnaştırıldı,” – dide.

Saqlanu ministrlığı süzçese İgor’ Konaşenkov ta Ukraina köçläreneñ yuğaltular kiçerüen açıqladı.

Konaşenkov Xar’kov töbägendä 100 tiräse ukrainalı xärbi häm 15 xärbi texnikanıñ yuqqa çığarıluın äytep, soñğı täwlektä Doneŝk töbägendä Ukraina armiyasenä bäyle 10 idarä üzäge belän 7 kiräk-yaraq deposınıñ yuq itelüen, 2 Su-25 törendäge xärbi oçqıç belän 10 keşesez hawa apparatınıñ töşerelüen citkerde.

Süzçe beldergänçä Ukraina citäkçelege Rusiyäneñ Belgorod häm Kursk şähärlärendäge mäxällälärgä Toçka-U ballistik raketalar häm Tu-143 Reys keşesez hawa apparatları belän tönlä höcüm oyıştırdı.

Älege töbäklärdä xärbi urınnarnıñ bulmawın citkergän Konaşenkov Ukraina tarafınnan ırğıtılğan raketalarnıñ rus hawa saqlanu sisteması tarafınnan hawada yuqqa çığarıluın açıqladı.

Belgorod gubernatorı Vyaçeslav Gladkov ta şähärdäge waqıyğada 40 öyneñ zıyan kürüen, 4 keşeneñ ülüen, 4 keşeneñ yaralanuın belderde.