NATO Liderlar sammitı başlandı

Yuğarı däräcäle oçraşu aldınnan illärneñ däwlät häm xökümät başlıqları ğailä fotosürätenä töşte.

Fotoğa töşü waqıtında İlbaşı Räcäp Tayyip Ärdoğan häm Amerika Quşma Ştatları İlbaşı Djo Bayden yänäşä tordı. Qul qısışqan ike lider annan soñ NATO Ğomum särkätibe Stoltenberg belän bergä jurnalistlar öçen fotoğa töşte.

İke lider soñınnan Angliya Baş ministrı Boris Djonson yanına barıp äñgämä qorıp cibärde.

NATO Ğomum särkätibe Stoltenberg Ukraina temalı berençe utırışnıñ açılışında yasağan çığışında sammitta Rusiyä häm Qıtay kebek avtoritar rejimnarnıñ qağıydälärenä tayanğan tärtipne tıyıp toruçı tağın da kübräk köndäşlelekkä sälätle dönyada NATOnıñ köçäytelüe öçen möhim qararlarnıñ qabul iteläçägen äytte.

İttifaqnıñ yul kartası üzençälegendäge Strategik konśepśiya dokumentınıñ yaña variantınıñ qabul iteläçägen xäterlätüçe Stoltenberg ittifaqnıñ tıyıp torıp totqarlaw häm saqlanu köçen küätländeräçäklären, Şveśiya belän Finlyandiyanıñ çaqırıluı belän NATO işekläreneñ açıq buluınıñ kürsäteläçägen belderde.

Stoltenberg Ukraina İlbaşı Volodimir Zelenskiyneñ liderlarğa möräcäğät itep çığış yasayaçağın häm Ukraina öçen kiñ qırlı yärdäm paketınıñ qabul iteläçägen dä citkerde.

Sammitnı qabul itüçe İspaniyanıñ Baş ministrı Pedro Sançez ta yasağan çığışında: "Bez qabul itäçäk qararlar kiläse 10 yıllıq köçebezne häm çığanaqlarıbıznıñ qullanuın bilgeläyäçäk. Dön’ya bezne küzätä. Härkemgä berlek häm berdämlegebezne, kötkännärebezne üti alaçağıbıznı kürsätäçäkbez”, - dip äytte.

Törkiyäne, Finlyandiyanı häm Şveśiyanı öç yaqlı memorandumğa qul quyuı uñayınnan täbrik itüçe Sançez: "Bu ike ilneñ NATOğa kerüe möhim borılış noqtası bulaçaq”, - dip belderde.