Hindıstan häm Bangladeşta afätlär

Hindıstan häm Bangladeşta atna başınnan birle küzätelüçe köçle yawım-töşem su basu häm cir şuışularğa kiterde.

Afätlärdä kim digändä 57 keşeneñ ğomere özelde.

Hindıstan matbuğatındağı xäbärlärgä kürä Hindıstan häm Bangladeşta kürelgän su basu, cir şuışuı häm dawıllar millionnarça keşeneñ tormışına tiskäre täêsir itte.

Hindıstannıñ Bixar vilayätendä pänceşämbe könne dawıl kiterep çığarğan waqıyğalarda kimendä 33 keşe ülde.

İldä afättä iñ küp zıyan kürgän Assam vilayätendä 14 keşe yaqtı dön’yadan kitte.

Asamda 850 meñnän artıq keşe afättän zıyan kürde, 90 meñnän artıq keşe öylärennän imin urınnarğa küçende.

Töbäktäge igen-basular häm aşlıqlar da su êçendä qaldı.

Bangladeşnıñ tön’yaq-könçığışında köçle yawım-töşem arqasında yılğalar taştı.

Afättän töbäktäge 2 million keşe täêsirlände. Bangladeşlı räsmi zatlar xäzergä qadär su basu arqasında 10 keşeneñ ülüen açıqladı.

İlneñ tön’yaq-könçığışındağı Silhet şähärendä yaqınça 50 meñ yort utsız qaldı.

Belgeçlär dön’yaküläm cılınunıñ yawım-töşemnärne arttıruı arqasında Bangladeş häm Hindıstanda tağın da köçle su basularnıñ kürelä alınaçağı turında kisätä.