Pentagon "oçuçı tälinkälär"ne öyränügä nıqlap totına

Amerika Quşma Ştatları bilgesez oçuçı ob’yektlarnıñ kübäyep kitüen centekläp tikşeräçäk. AQŞnıñ xärbi-diñgez küzläw direktorı urınbasarı häm bilgesez hawa küreneşläre missiyäse citäkçese Skott Brey UFOlar turında 400 xäbär aluların, şularnıñ 256sınıñ soñğı ber yılda kilüen söyläde.

İlneñ Kongressı 50 yıldan soñ täwge tapqır älege ob’yektlar belän bäyle xalıqqa açıq utırış ütkärde. Anda qayber UFOlarnıñ xärbi oçuçılar tarafınnan töşerelgän videoları kürsätelde häm bu cisemnärneñ çınbarlıqta buluı turındağı sorawlarğa cawap êzlände.

Utırışta Skott Brey tışında Pentagonnıñ küzläw bülegennän Ronal’d Moultri da çığış yasadı. Alar “bilgesez oçuçı ob’yektlar” bularaq ataluçı küreneşlärneñ nigezlären bilgeläw öçen nıqlı qararğa kilülären söyläde.

“Bilgesez oçuçı ob’yektlar turında xäbärlär 400gä citte. Bülekneñ uzğan yılğı xisabında 2004nçe yıldan başlap 2021nçe yılğa qadär tulayım 144 xäbär bar ide,”-dide Skott Brey. Ul qayber illär belän mäğ’lümat almaşuların da belderde.

Skott Brey häm Ronal’d Moultri älege cisemnärneñ Cirdän yıraqta da tormış barlığın dälillämäwen assızıqlıy. Tik alar qayber oçraqlarnı berniçek añlatıp bulmawın qabul itä. Älege fenomennarnı tikşerüneñ töp maqsatı - milli qurqınıçsızlıqqa yanaw ixtimalın isäptän töşerü. Oçuçı ob’yektlar artında Qıtay, Rusiyä yäisä şäxsi şirkätlärneñ yaña texnologiyälär belän bäyle êşçänlekläre torırğa mömkin.  

Skott Brey AQŞ oçuçılarınıñ älege bilgesez cisemnär belän bernindi êlemtägä kerergä tırışmawın häm alardan da êlemtä signalı almawların äytte. “Bilgesez ob’yektlar belän bäreleşü oçraqları bulmadı, tik kimendä 11 tapqır yaqınnan uzuları terkälde,”-di ul.  

Kongressta Pentagonda uzğan yıl tözelgän häm “bilgesez oçuçı ob’yektlarnı” tikşerüçe programma turında da fiker alıştılar.