“Äl Cäzirä” xäbärçeseneñ üterelüe rizasızlıq uyattı

Fälästin xökümäte räise Möxämmät İştiyyä Katar telekanalı “Äl Cäzirä” xäbärçese Şirin Äbu Akiläneñ üleme öçen İzrailne cawaplı itep kürsätte.  Ul Bel’giyä başqalası Brüssel’dä Awrupa Parlamentı räise Roberta Metsola belän oçraşqannan soñ belderü yasadı. İştiyyä jurnalistnıñ İzrail ğaskäre tarafınnan üterelüen ğayepläp bolay dide: “Bu cinayät’ ğamäle. İskitkeç xatın-qız häm icadi jurnalist Äbu Akiläneñ üterelüe tulısınça İzrail cawaplılığında. Äbu Akiläne barlıq fälästinlelär yarata ide. Ul här könne fälästinlelärneñ öylärenä xäbärläre belän kerä ide. İzrailneñ teläge barı anı üterü genä tügel ide. Ğadellekneñ tawışın, tınıçlıqnıñ awazın häm İzrailne xalıqara mäxkämälärgä iltäçäk tawışnı üterergä telädelär”.

İştiyyä waqıyğanı ğayepläp kenä qalmayaçaqların, anı İzrailne xalıqara mäxkämälärgä kiteräçäk ğamälläre arasına kertäçäklären assızıqladı. “Äbu Akiläneñ üterelüe oçrağı İzrailneñ ber ğayepsez keşelärgä qarata qılğan cinayät’läreneñ açıq dälile bulaçağın uylıym,”-dide ul.

Fälästin tışqı êşlär ministrlığı da wazıyfasın başqarğan waqıtta üterelgän xäbärçeneñ “İzrail terrorçılığı qorbanı” buluın belderde. Yazmada Äbu Akiläneñ belä torıp üterelüe assızıqlana.

Belderüdä İzrailneñ Fälästin xalqına qarata êşlägän cinayät’lären yäşerü öçen sistemalı räweştä basıp alu säyäsäten däwam itüe äytelä.

Tışqı êşlär ministrlığı matbuğat häm keşe xoquqların saqlawçı oyışmalarğa waqıyğanı Xalıqara cäza mäxkämäsennan başlap barlıq xökem yortlarına citkerergä çaqırdı.

“Äl Cäzirä” kanalınıñ xatın-qız xäbärçese Şirin Äbu Akilä Yordannıñ basıp alınğan könbatış üzänlegendäge Cänin şähäre möhacir lagerında İzrail ğaskärläre tarafınnan atıp üterelde. Fälästin sälamätlek saqlaw ministrlığı beldergänçä, anıñ başına çın yädrä tigän.  

Jurnalist İzrail armiyäseneñ Cänin lagerındağı basqınnarın küzätep bara ide.

“Äl Cäzirä” kanalı  Şirin Äbu Akiläneñ üleme öçen İzrail xökümäten cawaplı itep kürülären belderde.  Kanal sośial’ media akkauntları aşa bolay dip citkerde: “İzrailneñ basıp aluçı köçläre xäbärçebez Şirin Äbu Akiläne suıq qanlılıq belän, xalıqara qanun häm normalarnı bozıp, aldan uylanğan plan belän üterde”.

Belderüdä jurnalistnıñ kem buluın kürsätüçe matbuğat xezmätkäre jiletı kigän waqıtta nişanğa alıp çın yädrälär belän atıp üterelüenä iğ’tibar cälep itelä. “Äl Cäzirä” kanalı waqıyğanı küzätep baraçaqların assızıqladı.

İzrail tışqı êşlär ministrı Yair Lapid jurnalist xatın-qıznıñ üterelüe belän bäyle bularaq fälästinlelärgä urtaq mediśina tikşerenüe täq’dim itülären belderde. Ul matbuğat xezmätkärlären qaynar noqtalarda saqlaw kiräklegen häm çınbarlıqnı öyränü öçen härkemneñ cawaplı buluın äytä. Lapidnıñ belderüendä Akiläneñ İzrail armiyäse açqan ut näticäsendä ülüenä qağılışlı ber süz dä urın almıy.  

Fälästin bäysezlek oyışması İzrail köçläreneñ 2000nçe yıldan birle basıp alınğan cirleklärdä, Gazzä häm İzraildä wazıyfa başqaruçı 55 fälästinle jurnalistnı üterüen, ä 16 qaläm iyäseneñ törmädä totıluın citkerde.