Mariupol'dä 120 meñ keşe qamalışta qaldı

Ukraina däwlät başlığı Volodimir Zelenskiy rus köçläre qulğa töşergän cirleklärdän yaqınça 500 meñ ukrainalınıñ Rusiyägä çığarıluın äytte. Ul älege watandaşlarnıñ dokumentları tartıp alınuın häm êlemtädän mäxrüm itelüen citkerä. “Watandaşlarıbız Rusiyäneñ yıraq töbäklärenä taratıla,”-di Zelenskiy.

Ukraina liderı suğışnıñ 57 könendä Rusiyä qulğa töşergän yaqınça 1 meñ toraq punktnı qotqaruların, tik äle haman basıp alınğan qala häm awıllarnıñ küp buluın assızıqladı. Ul awrupalılarğa möräcäğat’ itep bolay di: “Leopard tankları, bronetexnika, korablarğa qarşı raketalar - bolar sezneñ qul astında bulğan häm Awrupanıñ bäysezlegen saqlarğa yärdäm itäçäk qorallar. Şuña kürä bu yärdämne bezgä täêmin itüegezne sorıym”.

Zelenskiy Mariupol’dä, ukrainalı suğışçılardan tış, kübese xatın-qız häm balalar bulğan 120 meñ grajdanlınıñ qamalış astında qaluın da äytte.

Ukraina liderı İspaniyä häm Daniyä xökümäte räisläre belän söyläşüdän soñ oyıştırılğan matbuğat cıyılışında kiläse çornıñ ileneñ könçığışı öçen awır bulaçağın citkerde. Ul Mariupol’däge Azovstal’ êşxanäsendä yaqınça 400 yaralı Ukraina xärbiyeneñ qaluın, alarnı äsir almaşu nigezendä alu öçen qarşı yaqqa täq’dim yasawların da belderde.

“Xärbilärebez yanında grajdanlılarıbız da bar. Alarnıñ kübese xatın-qızlar häm balalar. Yaqınça 120 meñ keşe Mariupol’dä qamalışta,”-dide Zelenskiy.