"İqtisadi yuğaltularnı qaplar öçen 7 milliard dollarğa ixtıyacıbız bar”

Dön’ya bankı häm Ukraina xökümäte Rusiyä 24nçe fevral’da höcümnären başlatqan Ukrainağa yärdäm mäs’äläsen söyläşer öçen qayber illärne wäkillek itkän ministrlar däräcäsendä tügäräk östäl cıyılışı oyıştırdı.

Cıyılışta Zelenskiy video konferenŝiya aşa qatnaştı häm Rusiyä höcümnäreneñ Ukrainağa salğan zıyannı añlattı.

İldä mäktäplär, universitetlar, xastaxanälär, êş urınnarı häm asqorımanıñ cimerelüen beldergän Ukraina ilbaşı Rusiyäneñ Qara diñgez portların blokada astına aluınıñ isä Ukrainanıñ êksportı häm dön’yanıñ azıq-tölek iminlegenä täêsir itüen äytte.

“İqtisadi yuğaltularnı qaplar öçen ayına 7 milliard dollarğa ixtıyacıbız bar,” – dide ul.

Zelenskiy beldergänçä xalıqara cämäğat’çelek Rusiyäne Xalıqara Valyuta Fondı häm Dön’ya Bankı kebek xalıqara finans oyışmalardan çitläşterergä tiyeş. İlbaşı barlıq illärne Mäskäw citäkçelege beläñ mönäsäbätlärne tuqtatırğa çaqırdı.

Dön’ya bankı başlığı Dêvid Malpass isä cıyılışta yasağan çığışında Rusiyäneñ höcüme arqasında Ukrainada binalar häm asqorımağa salınğan zıyannıñ 60 milliard dollarğa citüen häm bu sannıñ suğış däwam itkän sayın artaçağın citkerde.

Malpass Ukrainanıñ töp däwlät xezmätläreneñ däwamı öçen xäzerge waqıtta 3 milliard dollardan artıq çığanaqnıñ äzerläp quyıluın xäterlätte.

Xalıqara valyuta fondı başlığı Kristalina Georgiyeva isä suğışnıñ Ukraina iqtisadı öçen cimergeç buluın belderde.

Georgiyeva kiläse 2-3 ay êçendä Ukrainada xökümät häm iqtisadnıñ suğış şartlarında êşçänlek başqara aluı öçen ayda yaqınça 5 milliard dollarğa ixtıyac toyılaçağın uylawların açıqladı.