"Ukrainada 167 bala yaqtı dön’yadan kitte"

Ukraina Başprokuraturasınnan yasalğan açıqlawğa kürä Rusiyä armiyaseneň bombağa totuında 927 uqu yortına zıyan salındı, bolardan 83e bötenläy cimerelde.

Açıqlawdan kürengänçä Rusiyä höcümnären başlatqan 24nçe fevral’dan bügengä qadär 167 balanıň ğomere özelde. 279 bala yaralandı.

Ukrainanıň prem’yer-ministr yärdämçese İrina Vereçuk bäreleşlär küzätelgän töbäklärdän kiçä 3800dän artıq keşeneň êvakuaŝiyalänüen belderde.

“Kiçä 3846 keşe êvakuaŝiyalände. Ber köndä 2216 keşe üz maşinalarında Mariupol’-Berdyansk gumanitar yärdäm koridorları aşa Zaporoj’yeğa barıp citte. Bolardan 1496ısı Mariupol’ şähärennän kilde. 720 keşe Pologi, Vasil’yevka, Berdyansk häm Melitopol’ şähärlärennän Zaporoj’yeğa kilde,” – dide Vereçuk.

Rusiyä armiyaseneň Ukrainadağı höcümnäre xaqında mäğlümat birgän İrina Vereçuk: “Berençe mäğlümatlarğa kürä Ukrainada kim digändä 26 meň m2 lık mäydan, 196 sälamätlek saqlaw oyışması, 300 balalar baqçası, 8 aêroport, 10 xärbi hawa mäydanı, 129 êşxanä häm êş urını, 22 meňnän artıq çaqrım yul häm 226 küpergä zıyan kilde yäisä yuqqa çığarıldı. Rusiyä ilebez iqtisadına salğan zıyannı qaplarğa tiyeş,” – dide.