İlon Mask Rusiyä xäbär çığanaqların kirtäläwdän baş tarttı

Êşmäkär İlon Mask Ukrainada aktivlaştırğan yasalma iyärçen internet sisteması proyektı “Starlink”ta Rusiyä xäbär çığanaqların çiklämäyäçägen belderde.

Teslanıñ yuğarı idaräçese Mask bu xaqta Twitterda citkerde. Anıñ äytüençä, qayber däwlät liderları Ukrainada qullanılışqa kertelgän sistemada Rusiyä xäbär çığanaqların kirtälärgä quşqan. Êşmäkär älege taläpneñ Ukrainadan yasalmawın assızıqladı. Mask, qoral belän yanamağan oçraqta, mondıy yulğa barmayaçağın äytte.

“Absolyut süz irege tarafdarı buluım öçen ğafu itegez,”-dide ul.

Mask ber Twitter qullanuçısınıñ “Rusiyä çığanaqlı xäbärlär propaganda” digän süzlärenä: “Barlıq xäbär çığanaqları öleşçä propaganda, qayberläre başqalarğa qarağanda tağın da köçleräk kenä” dip cawap birde.  

Öçençe kön Mask ukrainalılarnı Starlink internet sistemasın saqlıq belän qullanırğa çaqırdı. Kiçä isä ul bäreleş noqtalarına yaqın qayber Starlink terminallarınıñ berniçä säğat’ buyınça signal özüçelärneñ yoğıntısına duçar buluın, texnik törkemneñ yışlıqnı buuçılarnı äylänep ütä aluın citkerde.  

İlon Mask Ukraina xalqın köçle bulırğa çaqırdı, bu suğışnı telämäwçe Rusiyä xalqın da yaratuın äytte.