Rusiyä: "Ukraina belän suğış telämibez"

Rusiyä Ukrainağa höcüm itü niyätendä bulmawın belderde. Tışqı êşlär ministrlığınıñ mäğ’lümat häm matbuğat bülege citäkçese urınbasarı Aleksey Zayśev videokiñäşmä yulı belän uzğan brifingta Könbatış belän kiyerenkelek häm Ukrainanıñ könçığışı mäs’äläse turında söyläde.

Ul Könbatışnıñ Ukraina wäzğıyäten kiyerenkeläşterüen äytä.

"NATO däwlätläreneñ Ukrainanıñ könçığışında konfliktqa êtärüdän häm Ukrainanıñ êçke mäs’älärenä tıqşınudan tuqtayaçağına ömetlänäbez. Bu älege ildäge yaqlarnıñ kileşmäwçänleklärne dialog yulı belän çişüen täêmin itäçäk,”-dip söyli Zayśev.

Süzçe Rusiyäneñ Ukrainağa bärep kerü niyätendä bulmawın assızıqlap bolay däwam itä: “Rusiyäneñ berkemgä dä höcüm itärgä telämäwen ällä-niçä tapqır belderdek. İke xalıq arasında suğış turında uylarğa da telämibez. Tik Ukrainağa yünälgän diñgez ar’yağı köçläre başqa törle uylıy. Alar Rusiyäneñ Ukrainağa höcüm itüe häm şunıñ belän böten Könbatış dön’yasın üzenä qarşı quyuı sśenariyın teli”.

Zayśev Ukrainanıñ Donbass mäs’äläse belän bäyle söyläşü prośessın sabotajlawın belderä. “Ukraina idaräsen bäysez xäräkät itärgä, üz däwläte belän watandaşlarınıñ mänfäğat’lären uylarğa häm Doneśk, Lugansk mäs’äläsenä dialog yulı belän çişeleş tabarğa çaqırabız,”-di ul.

NATO ğomum särqatibe Yens Stoltenberg könçığışta ittifaqnıñ yoğıntısın köçäytergä teläwlären äytkän ide. Zayśev bu belderügä cawap itep bolay dide: “NATO Könçığış Awrupadağı däwlätlärdän köçlären çigendersä, xärbi kiyerenkelek kimiyäçäk. Monı êşlärgä çaqırabız. Bu - iminlek garantiyäläre mäs’äläsendä NATOğa cibärgän täq’dimnärebez arasında töp şartlarnın berse.”