"Ukrainadan kitegez"
Avstraliyä häm Franśiyä üz watandaşların Ukraina mäs'äläsendä kisätte
Avstraliyä xökümäte watandaşların Rusiyä belän kiyerenkelege artqan Ukrainadan kitärgä çaqırdı.
“The Sydney Morning Herald”nıñ xäbärenä qarağanda, tışqı êşlär ministrlığınıñ yazmaça belderüendä “Ukrainağa säyäxät itmägez” dip kisätü yasala. Anda, şulay uq, älege ildäge kiyerenkelek säbäple konsullıq xezmäte häm yärdämnäreneñ çikle bula aluı citkerelä. Ministrlıq Avstraliya watandaşlarına qurqınıçsız urın tabarğa äzer bulırğa quştı. İl diplomatlarınıñ ğailäläre belän bergä Kiyevtan kitä başlawları belderelde.
Franśiyä dä üz watandaşlarına Rusiyä belän kiyerenkelege artqan Ukrainağa säyäxätlären kiçekterergä kiñäş itte. Tışqı êşlär ministrlığınnan yasalğan belderüdä Rusiyä berlekläreneñ Ukraina çiklärenä kiterelüe belän tuğan wäzğıyät’ säbäple tağın da iğ’tibarlı bulırğa, ilneñ tön’yaq häm könçığışındağı çik töbäklärenä barmasqa kiräklege äytelä.
Monnan alda Amerika Quşma Ştatları däwlät departamentı da, Rusiyäneñ bärep kerüennän qurqıp, Kiyev ilçelegendäge xezmätkärläreneñ ğailälärenä Ukrainadan kitü kürsätmäse birde. AQŞtan soñ Angliya Kiyev ilçelegendäge xezmätkärlären qaytara başladı.
