Angliyä süriyälelärne deportaśiyälämi

Bu turıdağı belderü êçke êşlär ministrlığınıñ Süriyädän kilgän ber migrantnıñ sıyınu möräcäğaten kire qağuınnan soñ yasaldı

1761529
Angliyä süriyälelärne deportaśiyälämi

Böyekbritaniyä, Süriyäneñ qurqınıçsız urın bulmawı säbäple, älege ildän kilüçe möhacirlärne kire cibärmäyäçäk.

Angliyä êçke êşlär ministrlığınnan yasalğan belderüdä bolay diyelä: “Xäzerge şartlarda keşelärne Süriyägä cibärmibez. Angliyä Süriyäneñ xätär buluı xaqındağı BMO qararları belän kileşä”.

Belderü êçke êşlär ministrlığınıñ Süriyädän kilgän ber migrantnıñ sıyınu möräcäğaten kire qağuınnan soñ yasaldı.

“Guardian” gazetınıñ 9nçı ğıynvar sanındağı xäbärdä 25 yäş’lek migrantnıñ 2020nçe yılnıñ mayındağı sıyınu möräcäğatendä Süriyägä kire qaytsa, xärbi qaçaq bularaq qulğa alınaçağı häm ütereläçäge belderelüe yazıla. Tik êçke êşlär ministrlığı säbäpne citärlek dip sanamıy häm uzğan ayda möräcäğat’ne kire qağa. Cawapta migrantnıñ üz watanında êzärleklänü küräçäge belän bäyle anıq ixtimalnıñ bulmawı yazıla.   

 Keşe xoquqların küzätü oyışmasınıñ 2021nçe yılnıñ oktyabrendä çığarğan xisabında üz teläkläre belän kire qaytuçılarnıñ Süriyä xökümäte häm aña bäyle suğışçılar tarafınnan cäzalaw, üterelü, êzärleklänü häm urlanuğa duçar buluı turında citkerelä. Anda sıyınuçılarnıñ Süriyägä tapşırılmasqa tiyeşlege assızıqlana.



Bäyläneşle xäbärlär