AQŞ häm BMO Qazaqstanda tınıçlıqqa çaqırdı
Amerika Quşma Ştatları citäkçelege Qazaqstanda “tınıçlıq” häm “konstituśion oyışmalarğa xörmät” çaqıruın yasadı
AQŞ däwlät departamentı süzçese Ned Prays yazma belderüe belän İlbaşı Djo Bayden citäkçelegeneñ Qazaqstandağı waqıyğalarnı küzätep baruın citkerde.
Prays belderüendä, qırıslıq çaraların häm milekkä zıyan kiterelüen gäyepläwlären iskärtep uzıp: "Häm räsmilärne häm dä protestçılarnı tınıç bulırğa çaqırabız. Böten Qazaqstan xalqınıñ konstituśion oyışmalarına, keşe xoquqlarına, matbuğat iregenä ixtiram kürsätelüen häm bolarnıñ yaqlanuın telibez. Ayıruça böten yaqlarnı ğadättän tış xälgä kileşü yaqlı çişeleş tabarğa çaqırabız”, - dip äytte.
Şul uq waqıtta Berläşkän Millätlär Oyışması Qazaqstanda däwam itüçe protestlar häm ildä ğadättän tış xälneñ iğ’lan itelüe arqasında tınıç bulırğa, köç qullanudan saqlanırğa häm dialogqa çaqırdı.
BMO Ğomum särkätibe süzçese Stefan Dyujarrik Qazaqstandağı täräqqıyätlärne borçılıp küzätep toruların belderde.
Dyujarrik Qazaqstanda böten taraflarnı tınıç bulırğa, köç qullanudan saqlanırğa häm dialogqa çaqırdı.
Qazaqstannıñ könbatışında 2nçe ğıynwarda sıyıqlaştırılğan gaz yağulığınıñ bäyäseneñ artuı häm ildäge sośial’-iq’tisadi wazğıyätneñ naçarayuı säbäbe belän başlatılğan rizasızlıq çaraları ilneñ başqa töbäklärenä cäyelde.
Uram tartqalaşularına äylängän rizasızlıq belderü çaraları waqıtında iminlek köçläre belän protestçılar arasında bäreleşlär kilep çıqtı.
Qazaqstan İlbaşı Qasım Cömärt Tokayev başlatılğan protestlardan cawaplı totqan xökümätneñ wazıyfadan kitüen qabul itte.
Rizasızlıq çaralarınıñ il külämendä taraluı näticäsendä başta başqala Nur Soltanda, Almatı şähärendä häm Mangistau vilayätlärendä ğadättän tış xäl iğ’lan itelde.
Soñınnan ğadättän tış xälneñ ilneñ böten töbäklärendä dä ğamäldä buluı belderelde.
