AQŞ çınlıqta niqadär ğayepsezne ütergän?
AQŞ Saqlanu ministrlığınıñ Yaqın Könçığıştağı êşçänlege belän bäyle xisap jurnalistlar qulına êläkte
“New York Times” gazetı Amerika Quşma Ştatlarınıñ küzläw oyışmaları birgän yalğış mäğ’lümat arqasında üterelgän tınıç xalıq sanınıñ räsmi kürsätkeçlärdän kübräk buluın belderde. Basma AQŞ Saqlanu ministrlığınıñ Yaqın Könçığıştağı êşçänlege belän bäyle xisapnı qulına töşerde.
Gazetta yazılğança, AQŞ armiyäse 2014nçe yıldan birle regionda yasağan hawa höcümnärendä üterelgän grajdanlılarnıñ sanın kimetep kürsätä. Xärbilär Ğıyraq häm Süriyädä ğomere özelüçelärne 1417 dip xisap birgän bula. Tik “New York Times” uzdırğan tikşerenü tögäl san birmäsä dä, grajdanlılarnıñ ülemnäreneñ monnan bik küpkä artıq buluın açıqlıy. Mäsälän, 2016nçı yılda Süriyädä AQŞ oyıştırğan ber höcümdä, xärbi çığanaqlarğa qarağanda, 7dän 24kä qadär grajdanlı üterelgän.Tikşerenü isä anda, çınlıqta, 120dän artıq ğayepsez keşeneñ hälaq buluın açıqlıy.
Monnan tış, AQŞ köçläre 2017nçe yılda Ğıyraqnıñ Musul şähärendä êçenä 4 keşelek ğailä utırğan avtomobil’ne bombalı texnika dip sanap yalğış utqa tota. Älege höcümdä maşinadağılar belän bergä 7 keşeneñ ğomere özelä.
