İndoneziyada ülemçel yanartaw attı
Kürüçelär anı qıyamät köne dip atıy
İndoneziyanıñ Könçığış Yava töbägendäge Semeru yanartawı attı. Anda kimendä 13 keşeneñ ülüe, 100gä yaqınınıñ yaralanuı turında xäbär itälär.
3 meñ 676 metr biyeklektäge yanartawnıñ şartlawı säbäple şul tirädäge toraq punktlar köl häm töten belän qaplana. Töbäk wäqalätlese Torikul Xaq ber kanalğa interv’yusında bik küp awılnıñ qarañğılıq êçendä qaluın, yözlärçä keşeneñ imin urınğa êvakuaśiyälänüen belderde.
Limajang töbäge räise urınbasarı İndax Masdar şartlawda gäwdäse bik nıq peşkän 1 keşeneñ ülüen, 41 keşeneñ isä törle tän cäräxätläre belän xastaxanägä salınuın citkerde. Ul ike keşeneñ yuqqa çığuın häm qom kar’yerında berniçä êşçeneñ çığa almıyça qaluın äytte.
Soñraq milli ğadättän tış xällär idaräse wäqalätlese Abdul Muxari ülüçelärneñ 13kä citüen, alarnıñ barı 2seneñ kem ikänen açıqlıy aluların xäbär itte. Ul 98 keşeneñ yaralanuın häm kübeseneñ peşüdän däwalanuın citkerde. 908 keşene imin urınnarğa küçergännär. Kar’yerda çığa almıyça qalğan 10 êşçe dä qotqarılğan.
“Tın okean ut qırşawı” dip ataluçı cir teträw häm yanartaw quşağına kerüçe İndoneziyada yaqınça 130 aktiv vulkan bar.
Bäyläneşle xäbärlär
"İzrailneñ Ğazzägä yärdämnärne totqarlawı - suğış cinayäte"
Bu xaqta BMOnıñ Keşe xoquqları yuğarı komissarı Volker Türk belderde
Amerika BMO xisabın oşatmadı
AQŞ İzrailneñ genośid başqaruın açıqlawçı xisapnıñ antisemit xarakterda buluın alğa sörde