Urlanğan missionerlarnıñ ikese irektä

Gaitida 16nçı oktyabr’dä ber banda tarafınnan urlanğan AQŞlı missioner törkemeneñ 17 äğ’zasınnan 2se irekkä cibärelde. Alarnıñ härberse öçen 1 million dollar aqça soralğan ide.

Cirle matbuğatta çıqqan xäbärlärgä qarağanda, Ogayodağı “Xristian yärdäm xezmätläre” oyışmasınıñ internet säxifäsendäge belderüdä irekkä cibärelgän 2 totıqnıñ xäle äybät buluı äytelä.

“Mäğ’lümatnı çiklängän räweştä genä citkerü mömkin, tik cibärelgän 2 keşeneñ ışanıçlı qullarda, yaxşı xäldä häm küzätü astında buluın belderä alabız” diyelä xäbärdä.

Missionerlarnıñ Gaitida ber yätimxanä tözelgännän soñ AQŞqa kire qaytqanda “400 Mavozo” dip ataluçı banda tarafınnan urlanuı mäğ’lüm. Soñğı waqıtta cirlektä keşe urlaw oçraqlarında citdi artu küzätelä. Alar öçen berniçä yöz dollardan 1 millionğa qadär aqça taläp itälär.

Gaitidagı BMO integraśiya ofisınıñ uzğan aydağı xisabına qarağanda, 2021nçe yılnıñ täwge 8 ayında ilneñ poliśiyäsenä kimendä 328 keşe urlaw oçrağı belderelde. Bu san 2020nçe yılda 234 ide.