Baydennıñ sälamätlege borçu tudıramı?

Amerika Quşma Ştatları ilbaşı Djo Baydennıñ tabibı Kevin O’Konnor, uzdırğan ğadäti mediśina tikşerenüennän soñ, kliyentınıñ xäleneñ “däwlät başlığı wazıyfasın ütärlek” buluın belderde.

Bayden 79 yäşe tulır aldınnan ber kön êlek Uolter Rid gospitalendä yıllıq sälamätlek kontrolennän uzdı. Tabibı bolay dip belderde: “Bayden 78 yäş’lek ir-at öçen sälamät häm köçle. Ul ilbaşı wazıyfasın uñışlı räweştä cirenä citkererlek xäldä”.

Şul uq waqıtta, tabib O’Konnor Baydennıñ yörüe häm tamağındağı “äçelek” mäs’äläsendä östämä tikşerenülär ütkärergä teläwen äytte. Ul ilbaşınıñ soñğı waqıtta äkrenräk yöri başlawın häm monıñ ber yıl êlek ayağın sındıruı belän bäyle bula aluın belderde.

Tabib fikerençä, Baydennıñ gel tamağın qırıp toruı aşqazanında reflyu bula aluın kürsätä. Kolonoskopiyadä borçılırlıq berni oçramağan.

Bayden AQŞ tarixındağı iñ qart ilbaşı. 19nçı noyabr’ irtäsendä kolonoskopiyä yasalğan waqıtta anesteziyä aldınnan ul wazıyfasın 85 minutqa viśe-prezident Kamala Xarrisqa tapşırıp tordı.