Ğalämdä xäwefle şartlaw

Rusiyä iyärçengä qarşı raketa sınawı qısalarında üz yasalma iyärçennäreneñ bersen şartlattı. Anıñ kisäkläre törle yaqqa taraldı, şul säbäple Xalıqara ğaläm stanśiyäsendäge astronavt häm kosmonavtlar qapsulalarğa kerep qaçtı. Anda xäzer 7 êkipaj äğ’zası bar. 4se amerikalı, berse – nemeś häm 2se – rusiyäle.   

Ğaläm stanśiyäse Cirdän yaqınça 420 çaqrım biyeklektä orbitada äylänä.

Raketa sınawında üz yasalma iyärçenen şartlatqan Mäskäwgä AQŞ däwlät departamentı süzçese Ned Prays kisken rizasızlıq belderde. Ul iyärçenneñ 1500 kürenerlek zurlıqta häm yözlägän meñ keçkenä kisäkkä ayırıluın häm monıñ Cir orbitasındağı başqa iyärçennär häm xezmät itüçe astronavtlar öçen citdi yanaw tudıruın belderde.  

NASA idaräçese Bill Nel’son da Rusiyäneñ ğaläm raketası sınawına bik nıq açuları çığuın citkerde. “Rusiyäneñ barı amerikalı hän xalıqara urtaq astronavtlarnı ğına tügel, ber ük waqıtta üz kosmonavtların häm Qıtay ğaläm stanśiyäsendäge taykonavtlarnı da qurqınıç astına quyuı şaqqattırğıç,”-dide ul.

Rusiyä ğaläm agentlığı Roskosmos isä sınawnıñ arttırılıp kürsätelüen citkerde. Annan yasalğan belderüdä êkipajnı, standart prośedura quşqança, kapsulağa yäşerenergä mäcbür itkän cisemneñ stanśiyädän yıraqlaşuı äytelä.  

Xalıqara ğaläm stanśyäseneñ 23 yıllıq orbita ğomerendä cimerekleklärdän qaçu ğamäle kiräktergän yaqınça 30 xäwefle oçraq buldı. Alarnıñ öçese 2020nçe yılğa turı kilä.

2021nçe yılnıñ mayında keçkenä ğaläm çübe kisäge stanśiyäneñ ber robot qulında 5 millimetr zurlıqta tişek yasadı.