Kennedinıñ üterelüe turında yäşeren dokumentlar bastırılaçaq
Alarnıñ ber öleşe 15nçe dekabr’dän soñ xalıqqa çığarılaçaq
AQŞnıñ êlekkege ilbaşı Djon F.Kennedinıñ üterelüe belän bäyle yäşeren dokumentlarnıñ ber öleşe 15nçe dekabr’dän soñ basılıp çığaçaq. Bu xaqta Aq Yort belderde. AQŞ ilbaşı Djo Bayden imzası quyılğan yazma açıqlawda xäzerge waqıtta älege dokumentlarnıñ redakśiyälänüe häm êşneñ 15nçe dekabr’gä qadär tögällänäçäge äytelä. Qalğan dokumentlarnı redakśiyäläw öçen Milli arxivlar häm terkäwlär idaräsenä ber yıl waqıt birelä.
Belderüdä Kennedinıñ üterelüe “ul qurqınıç könne kiçergän amerikalılar häm Amerika tarixınıñ xäterendä yañarıp toruçı tirän milli faciğa” bularaq atala. Arxivtağı älege waqıyğa belän bäyle kollekśiyäneñ 90%ı, yäğ’ni 250 meñ dokument xalıqqa açıq xäldä.
Tarixi beleşmä: AQŞ ilbaşı Djon F.Kennedi 1963nçe yılnıñ 22nçe noyabrendä saylaw êşçänlege öçen Texasqa bara häm anda atıp üterelä.
Tikşerenüne ul çornıñ Yuğarı mäxkämäse räise Êrl Uorren citäkli. Anda ilbaşına atqan Li Xarvi Osval’dnıñ yalğız êş itüe näticäsenä kilälär. Tik tikşerenüneñ citärlek bulmawı turında tänqıyt’lär yañğırıy. Soñınnan Kongressta tözelgän komissiyä üterüneñ aldan süz quyışu bula aluın açıqladı.
Amerikanıñ milli arxivlar häm terkäwlär idaräse, 1992nçe yılda qabul itelgän qanun nigezendä, üterü belän bäyle yäşeren bulmağan bik küp dokumentnı bastırdı. Donal’d Tramp isä 2017nçe yılda meñnärçä yäşeren mäğ’lümatnı açıp saldı. Ämma qayberläre milli qurqınıçsızlıq yözennän xalıqqa belderelmäde.
