AQŞ Süriyädä 70 keşelek törkemne bombalağan

Amerika Quşma Ştatlarınıñ 2019nçı yılda Süriyädä terrorçı oyışma DEAŞqa qarşı suğışqan çorda xatın-qız häm balalardan toruçı yaqınça 70 keşelek törkemgä hawadan höcüm itüe bilgele buldı.

“New York Times” gazetında urın alğan xäbärdä äytelgänçä, älege waqıyğa 2019nçı yılnıñ 18nçe martında Bagxuz rayonında bula. Törkemne AQŞ aviaśiyäseneñ keşesez hawa apparatları açıqlıy, soñınnan öslärenä F-15E törendäge xärbi oçqıçlar belän 3 ayırım höcümdä 2 tonnadan artıq bomba ırğıtalar. Yaqınça 70 keşe ülä.

Älege waqıyğanıñ neçkälekläre täwge tapqır cämäğat’çelekkä çığarıla. “Bağxuz höcüme DEAŞqa qarşı suğış waqıtında iñ küp grajdanlınıñ ülemenä kitergän waqıyğalardan berse ide, tik AQŞ armiyäse tarafınnan berwaqıtta da xalıqqa belderelmäde,”-diyelä xäbärdä.  

Anda yazılğança, ber xoquq wäqalätlese höcümne tikşerelergä tiyeşle suğış cinayäte bularaq bilgelägän. Tik xärbi generallar, här adımda diyärlek, hälakät sıyfatındağı bu höcümne yäşerüçe yullar taba. Ülelär sanı azaytıla. Xisaplar kiçekterelä, steril’läşterelä häm yäşeren mäğ’lümat sıynıfına kertelä. AQŞ liderlığındağı koaliśiyä köçläre şartlaw mäydanın bul’dozerlar belän tigezli. Yuğarı liderlarğa bu xaqta äytelmi.

Höcümneñ neçkälekläre aylar buyı däwam itkän êşçänlek näticäsendä bergä cıyıla: yäşeren mäğ’lümat häm xisaplar centekläp qarala, isemnäre äytelmäwçe xezmätkärlär häm wäqalätlelär belän turıda-turı söyläşülär ütkärelä. Dälillär barısı AQŞ üzäk komandalığına cibärelä.

Xäbärdä äytelgänçä, komandalıq täwge tapqır älege höcümneñ yasaluın tanıy. Anda 16 DEAŞ äğ’zası belän 4 grajdanlınıñ üterelüen, qalğan 60 keşeneñ isä, terrorçılar kontrolendäge cirleklärdä xatın-qız häm balalarğa da qoral kütärtüläre säbäple, tınıç xalıqtanmı-yuqmı ikäne tögäl genä açıqlanmawı belderelä.