Tramp üzeneñ sośial' media platformasın iğ'lan itte

AQŞnıñ êlekkege ilbaşı Donal’d Tramp üz sośial’ media platforması “TRUTH Social”nı kiläse ayda qullanılışqa kertergä planlaştıruın belderde. Bilgele bulğança, Trampnıñ Twitter, Youtube häm Facebooktağı akkauntları 6nçı ğıynvarda AQŞ Kongressına basıp kerü oçrağınnan soñ “tuñdırılğan” ide. Şunnan soñ ul üz sośial’ platformasın buldıraçağın äytte. Donal’d Tramp anıñ zur texnologiyä şirkätläreneñ zolımına qarşı toraçağın citkerde. Ul älege şirkätlärne AQŞtağı oppoziśiya tawışın tıyuda ğayepläde.

“Şundıy dön’yada yäşibez: Taliban Twitterda zur urın alıp tora, ämma Amerikanıñ iñ söyelgän ilbaşına süz birelmi. Monı qabul itü mömkin tügel,”-dide Tramp.  

“TRUTH Social” kiläse ayda saylap alınğan keşelär öçen açılaçaq. Platformanıñ 2022nçe yılnıñ berençe çiregendä barlıq qullanuçılar öçen êşli başlayaçağı belderelde.

Süz uñayınnan, “TRUTH Social” iğ’lanınnan soñ berniçä säğat’ ütügä xakerlar tarafınnan cimerelde. Näticädä, älegä räsmi räweştä açılmağan platformağa Twitter qullanuçıları kerä aldı.

Belgeçlär Trampnıñ sośial’ çeltäreneñ Twitterğa bik nıq oxşawın belderä.