Törmädän qaçuçılarnıñ barısı dä êläkterelde

İzrailneñ tön’yağındağı Gilboa törmäsennän qaçqan 6 fälästinleneñ soñğı ikesen dä êläkterdelär. Alar Yordannıñ basıp alınğan könbatış üzänlegendäge Cenin şähärendä bula.

İzrailneñ “Yediot Ahronot” gazetınıñ xäbärenä qarağanda, êläkterelgän ike soñğı qaçuçı – “İslami cihad” xäräkäte äğ’zaları Yakup Nufeyat häm Äyxäm Fuad Kemamci.

Fälästinle 6 mäxküm 6nçı sentyabr’ irtäse İzrailneñ  köçle saq astındağı Gilboa törmäsennän tunnel’ qazıp qaçqan ide.

Qaçuçılar arasında bulğan Fätix xäräkäteneñ qorallı oyışması “Äl-Aksa şähitläre” äğ’zası Zäkäriyä äz-Zubäydi belän “İslami Cihad” xäräkätennän  Möxämmät Kasım äl-Arıda, Yakup Mäxmüt Kadri häm Äyxäm Fuad Mäxmüt Abdullah äl-Arıda aldanraq êläkterelgän ide.   

Fälästin çığanaqlarına kürä, İzrail törmälärendä 365e administrativ cäzalı bulğan yaqınça 4 meñ 500 fälästinle bar.