Tunis qaznasın kemnär talağan?

Tunis ilbaşı Kais Said ilneñ däwlät telekanalı ğomum mödire Lesad Dahişnı wazıyfasınnan aldı. Bu xaqta yazmaça belderü yasaldı. Dahiş urınına kanal belän idarä itü êşenä waqıtlıça  Avatıf äd-Dali bilgelände.

Şul uq waqıtta, ilbaşı Said däwlät aqçasınıñ urlanuı xaqında belderü yasadı. Ul älege summanı kire qaytaru häm moña qatışı buluçılarğa ştraf salu kiräklegen citkerde.

Said äytüençä, ildä däwlät aqçasın talawda 460 keşeneñ qatışı bar. Ul urlanğan summanıñ 13 milliard yarım Tunis dinarı (yaqınça 4 milliard 800 million dollar) buluın äytte. İlbaşı bu nisbättän kileşügä äzer ikänen belderep, aqça urlawçılarnıñ isemlegeneñ qulında buluın citkerde.

İsegezgä töşeräbez, 25nçe iyül’dä Tunista xökümät häm oppoziśiyä partiyälärenä qarşı yözlärçä keşeneñ qatnaşında protest çaraları uzdı. Şunnan soñ, ilbaşı Kays Said parlamentnıñ barlıq wäqalätlären tuñdıruın, deputatlarnıñ qağılğısızlığı tuqtatıluın, xökümät räisen wazıyfasınnan aluın häm anıñ urınına quyılaçaq başqa keşe belän idaräne däwam itäçäklären belderde.

Said üzen baş prokuror bularaq iğ’lan itte häm mäxkämägä dä qatıştı.

Tunis parlamentı räise häm Naxda xäräkäte liderı Raşid äl-Gannuşi bu qararlarnıñ qanunlı nigeze bulmawın belderde häm älege adımnarnı “tüntäreleş” dip atadı.