İzrail koronavirus vakśinaların yuq itäçäk

İzrailneñ, başqa däwlätlär almasa, qulında qalğan häm qullanu waqıtı tögällänep kilüçe 800 meñ koronavirus vakśinasın yuq itärgä mäcbür bulaçağı belderelde. Bu xaqta cirle matbuğat çaraları yaza. Xäbärlärdä älege vakśinalarnıñ qaysı firmanıqı ikäne äytelmi. Şulay da, Tel’-Aviv xökümäteneñ Biontex-Pfayzer preparatların aluı bilgele.

İzrail monnan alda 18nçe iyün’dä qullanu waqıtı çığuçı vakśinalarnı Fälästin belän almaşası ide. Kileşü qısalarında, İzrail qulındağı 1 millionnan artıq Biontex preparatın Fälästingä cibäräçäk, ä qarşı yaq Biontex şirkätennän sentyabr’ häm oktyabr’dä alaçaq vakśinaların İzrailgä biräçäk. Ämma Fälästin idaräse İzrail preparatlarınıñ qullanu waqıtı bik tiz arada betäçäge säbäple bu almaşudan baş tarttı.