Djordj Floydnı üterüçegä - 22,5 yıl törmä cäzası
Floydnı qulğa alğan waqıtta wazıyfasın naçar niyät belän qullanuı belderelgän êlekkege poliśiyä xezmätkäre Derek Şovenğa qarar çığarıldı
AQŞta afroamerikalı Djordj Floydnı üterüdä ğayeple dip tabılğan êlekkege poliśiyä xezmätkäre Derek Şovenğa 22 yıl yarım törmä cäzası birelde.
Minnesota ştatındağı Xennepin töbäk mäxkämäse 2020nçe yılnıñ mayında Floydnı qulğa alğan waqıtta wazıyfasın naçar niyät belän qullanuı belderelgän Şovennı 2nçe häm 3nçe däräcä üterüdä häm 2nçe däräcä aldan uylanılmağan üterüdä ğayeple dip taptı. Ul 22 yıl yarım räşätkä artında utıraçaq.
Şoven qulğa alu waqıtında 9 minut 29 sekund buyı teze belän Floydnıñ muyınına bastırıp tora. Qorbanı “sulış ala almıym” dip yalwaruğa qaramastan, ıçqındırmıy.
Floydnı aşığıç yärdäm belän xastaxanägä alıp kitälär, ämma ul anda can birä. Bu waqıyğa ildä qara tänlelärgä qarata poliśiyä zolımı bäxäslärenä ut östäde häm köçle rizasızlıq çaraları kiterep çığardı.
