AQŞ küzläw oyışması UFOlar turında söyläde

AQŞnıñ milli küzläw oyışması UFO bularaq ta bilgele kük waqıyğaları belän bäyle xisabın çığardı. Anda 2004nçe yıldan 2021gä qadär küzätelgän oçraqlarnıñ tikşerelüe belderelde.

Xisapta äytelgänçä, AQŞ xökümätenä bäyle çığanaqlardan 144 küzätü terkälä. Alarnıñ 80en ber’yulı berniçä sensor kürep ala.

Bilgesez ob’yektlar kübräk AQŞ armiyäse poligonnarı tiräsendä küzätelä. Bu älege rayonnarda radar häm sensorlarnıñ çiktän tış küp buluı belän bäyle.

Xisapta oçış texnikası nisbätennän tikşerelgän 21 bilgesez ob’yektnıñ 18eneñ ğadäti bulmağan xäräkät häm oçış üzençäleklärenä iyä buluı assızıqlana.  Qayberläre hawada êlenep qala, ikençeläre cilgä qarşı oça, öçençeläre tiz genä tizlek arttırıp, kisäk kenä tuqtıy.

Xisapta bilgesez kük waqıyğalarına berdänber añlatma birep bulmawı assızıqlana.  Bolarnıñ hawağa atılğan nindider qaldıq bula aluı da, atmosferadağı üzgäreşlärdän kilep çığa mömkinlege dä belderelä. Şul uq waqıtta, monıñ çit köçlärneñ nindider täcribä öleşe bulu ixtimalı da kire qağılmıy.

“Bu bilgesez kük waqıyğaları, ber ük waqıtta, AQŞ oyışmaları tarafınnan uylap çığarılğan yäşeren programmalar da bulırğa mömkin,”-diyelä xiapta.

Tağın ber ixtimal isä älegä fänni yaqtan añlatu tabılmağan cisemnär buluı.