Antivirus programmistı Djon Makafi ülde

Êşmäkär, antivirus programmasın uylap tapqan häm McAfee kompaniyäsenä nigez salğan Djon Makafi Barselona törmäsendäge kamerasında üle kileş tabıldı.Bu xäldän berniçä säğat’ êlek İspaniyä milli mäxkämäse anı AQŞqa tapşırunı raslağan.

Salımnardan qaçuda ğayeplänüçe Makafinı 2020nçe yılnıñ 3nçe oktyabrendä İstanbulğa kitärgä mataşqanda Barselona aêroportında qulğa alalar. Êşmäkärneñ AQŞta 2016nçı yıldan 2018gä qadär çorda 4 million dollardan artıq salım yäşerüe uylanıla. Makafinıñ kripto aqça satularda yalğıştıruçı kiñäşlär birep 23 million dollardan kübräk otuı alğa sörelä.  

75 yäş’lek êşmäkärne kamerasında üle kileş tapqannan soñ tabiblar anı tereltergä tırışa, ämma barıp çıqmıy. Kataloniya yustiśiyä departamentı barlıq bilgelärneñ Makafinıñ üz-üzenä qul saluın kürsätüen belderä. Bu faraz älegä räsmi bularaq raslanmadı.

Makafi İT-dön’yasında cete häm küp’yaqlı figura bula. Berençe çiratta, ul kompaniyäseneñ iñ täwge bulıp kommerśiyä maqsatlarında antivirus programması çığaruı belän tanıla.  “McAfee VirusScan”nıñ uñışı bu tarmaqta êşläwçe başqa şirkätlärgä êtärgeç birä. Alarnıñ milke xäzerge waqıtta milliard dollarlar belän isäplänä.

Makafi üzeneñ millionnarça dollar salım tüläwen, ämma salım dairäsendäge rişwätçelek turında şiqayät’ belderüe arqasında säyäsi basım qorbanına äwerelüen alğa sörä ide. AQŞta anı kimendä 6 yıl törmä cäzası kötkän.