NATO sammitı başlandı

Törkiyäne İlbaşı Räcäp Tayyip Ärdoğan wäkillek itüçe cıyılışta 30 berlektäş ilneñ liderı qatnaşa.

Yuğarı däräcäle oçraşunıñ kön tärtibendä ittifaqnıñ kiläse 10 yıllıq yul kartasınıñ bilgelänelüe, NATOnıñ strategik konśepsiyasınıñ yañartıluı, Qıtaynıñ kütäreleşe, soñğı yıllarda Rusiyä belän artqa kitkän mönäsäbätlärneñ torışı häm Ukraina, kiber yanawlar, terrorçılıq belän köräş, cimergeç texnologiyalar, klimat üzgäreşläreneñ iminlekkä yoğıntıları häm Äfğanstandağı NATO missiyasınıñ beterelüe qararınnan soñğı wazğiyät kebek mäs’älälär bar.

Amerika Quşma Ştatları İlbaşı Djo Bayden prezident bulıp saylanğannan soñ berençe tapqır qatnaşqan NATO sammitında transatlantik mönäsäbätlär dä quzğatılaçaq.

Sammitnıñ axırında NATO Ğomum särkätibe Yens Stoltenberg matbuğat oçraşuın oyıştırıp mäğ’lümat biräçäk.

Ayıruça sammit beldergeseneñ dä cıyılış azağında yasaluı kötelä.

Yuğarı däräcäle oçraşu qısalarında däwlät häm xökümät başlıqları kiçä kiçtän birle Bryussel’dä ike yaqlı söyläşülär ütkärä başlağan ide.

Cıyılış betkännän soñ da qayber liderlarnıñ NATO ştabında ike yaqlı oçraşularınıñ däwam itüe küzdä totıla.