İzraildä Netanyahu çorı bette
İzraildä “Kiläçäk bar” häm “Yamina” partiyalarınıñ äydäp baruçanlığında tözelgän koaliśiya xökümäteneñ ışanıç votumın aluı belän 12 yıl däwam itkän Baş ministr Binyamin Netanyahu çorı bette
Tawışqa quyu näticäsendä 120 keşelek parlamentta 60 xalıq ışanıçlısınıñ yaqlawı belän koaliśiya xökümäte ışanıç votumın aldı.
Naftali Bennett-Yair Lapid koaliśiyasına ışanıç belderelüe belän 2009nçı yılnıñ mart ayınnan birle baş ministr wazıyfasın başqarğan Netanyahu çorı tögällände.
Tawışqa quyudan soñ Netanyahu, Parlamenttağı xökümät känäfiyennän torıp, oppoziśiya öçen ayırılıp quyılğan urınğa barıp utırdı.
Annan soñ İzrailneñ yaña prem’yer-ministrı bulğan Naftali Bennett häm koaliśiya xökümäteneñ ministrları parlament mömbärennän ant itte.
Baş ministr wazıyfasın 2 yıl “Yamina” liderı Bennett başqaraçaq, 2023nçe yılnıñ avgust ayında isä wazıyfasın koaliśiya urtağı “Kiläçäk bar” partiyası liderı Lapidkä tapşıraçaq.
Bennett-Lapid koaliśiyası Netanyahuğa qarşı berläşkän häm törle qaraşlarğa iyä 8 partiyadan tora.
Häm parlamenttağı xalıq ışanıçlısı sanınıñ kritik çiktä buluı, häm dä partiyalarnıñ qayber mäs’älälärdä tulısınça törle qaraşlarğa iyä buluı arqasında İzraildä koaliśiyanıñ ğomere ozaq bulaçaqmı yuqmı ikänlege bäxäsläşelä.
Şul uq waqıtta Amerika Quşma Ştatları İlbaşı Djo Bayden İzrailneñ yaña baş ministrı Bennettqa şaltıratıp, yaña wazıyfası uñayınnan täbrik itte.
Aq Yorttan yasalğan belderügä kürä, Bayden AQŞ häm İzrail arasındağı mönäsäbätlärgä häm İzrailneñ iminlegenä “totrıqlı” yaqlawın täqrarladı.
Bayden Bennettqa töbäktäge şaqtıy awırlıqlar häm forsatlar aldında AQŞ häm İzrail arasındağı xezmättäşlekneñ nığıtıluı mäs’äläsendäge qatğıylığın citkerde.
Bayden Amerika Quşma Ştatlarınıñ İzraillelärneñ häm Fälästinlelärneñ tınıçlığı, iminlege häm mullığı öçen İzrail xökümäte belän tığız xezmättäşlek itäçägenä dä basım yasadı.
