10 meňgä yaqın fälästinle yäşägän cirlären taşlap kitte
Monıñ säbäbe - İzrailneň Ğazzägä höcümnäre
Berläşkän Millätlär Oyışması İzrailneň Ğazzägä höcümnäre waqıtında 10 meňgä yaqın fälästinleneň yäşägän cirlären taşlap kitärgä mäcbür buluın belderde.
BMO gumanitar êşlär koordinaśiya ofisınıň bu xaqtağı belderüendä älege keşelärneň mäktäplär häm mäçetlärdä yäşäwläre, su, azıq-tölek, gigiyena häm sälamätlek saqlaw xezmätläreneň çiklängän buluı citkerelä.
Belderüdä äytelgänçä, xastaxanä häm suğa ireşü êlektr ênergiyäsenä bäyle, läkin monıň öçen kiräk bulğan yağulıq yäkşämbe könne betäçäk.
BMO İzrail räsmilären häm fälästinle qorallı törkemnärne Berläşkän Millätlär Oyışmasınıň yağulıq, azıq-tölek, mediśina kiräk - yaraqları kiterüenä häm gumanitar yärdäm xezmätkärläre cibärergä röxsät birergä çaqırdı.
BMO gumanitar êşlär koordinaśiya ofisınıň belderüendä yaqlarğa xalıqara gumanitar xoquqnı häm keşe xoquqların xörmät itü kiräklege iskärtelde.
BMO ğomum särqätibe Antonio Guterriş ta yaqlarnı bäreleşlärne tiz arada tuqtatırğa häm aradaşçılıq êşçänleklärenä röxsät birergä öndäde.
