Ğıyraqta 3 könlek matäm

Ğıyraqnıñ başqalası Bağdadta koronavirus awıruları däwalanuçı xastaxanädä kiçä çıqqan häm 82 keşeneñ ğomeren özgän yanğınnan soñ 3 könlek milli matäm iğ’lan itelde.

Ğıyraq xökümäte räise Mostafa äl-Kazimi il külämendä xastaxanälär, qunaqxanälär häm başqa cämäğat’çelek urınnarında qurqınıçsızlıq çaralarınıñ ber atna êçendä kontrol’ itelüe öçen kürsätmä birde.

İlbaşı Bärxäm Salix isä yanğınnıñ säbäben açıqlaw öçen aşığıç räweştä tikşerü başlarğa ämer çığardı.

Sälamätlek saqlaw ministrlığı 4 cawaplı wäqalätleneñ êştän azat itelüen citkerde.

Yanğında ülüçelärdän tış, yaralanuçılar da küp. 110 keşe törle däräcädäge cäräxätlär ala.