NASAnıñ Van küle fotosı finalda
Konkurs 12nçe aprel’dä tögällänäçäk
Van küleneñ ğalämnän töşerelgän räsemnäre NASAnıñ fotokonkursında finalğa çıqtı. AQŞnıñ aviaśiya häm ğaläm agentlığı här yıl astronavtlar arasında şundıy yarış uzdıra. Anda küktän Cirneñ törle urınnarın töşergän räsemnär arasında iñ yaxşıları saylana.
Onlayn bularaq oyıştırılğan “Cir turnirı” dip ataluçı çarada dön’yadağı iñ zur soda küle bulğan Van küle fotosı finalğa çıqtı. Älege sulıq Törkiyädä.
Van külen astronavt Keyt Rubins 2016nçı yılnıñ 12nçe sentyabrendä töşergän. Räsem “xozur” kategoriyäsendä berençe buldı häm yarımfinaldağı köndäşe “Bolıt qatlamı”n uzdırdı. “Van küle” fotosı tawışlarnıñ 94%ın aldı. Finalda ul “Xäräkät itüçe yoldızlar” räseme belän yarışaçaq.
Konkurs 12nçe aprel’dä tögällänäçäk. Tawış birüdä NASAnıñ räsmi internet säxifäsendä qatnaşırğa mömkin.
