Avstraliyädä 50 yäş'tän keçelärgä AstraZeneka qadalmayaçaq
Xökümät qan quyıru oçraqlarınnan soñ şundıy belderü yasadı
Avstraliyädä AstraZeneka çığarğan Kovid-19 vakśinası qan quyıruğa kiterü säbäple 50 yäş’tän keçelärgä yasalmayaçaq. Bu xaqta xökümät räise Skott Morrison belderü yasadı. Ul ilneñ Vakśina texnik kiñäşläşü törkemeneñ täq’dimennän soñ 50 yäş’tän keçelär öçen Germaniyä biotexnologiyä firması BioNTexnıñ Amerika farmaśevtika şirkäte Pfayzer belän yasağan preparatın östen kürülären äytte.
Morrison yäş’ buyınça çikläwlär kertelgän Oksford-AstraZeneka vakśinasınıñ, az bulsa da, citdi qurqınıçı barlığın belderde. “Mömkin bulğança iñ döres mediśina kiñäşenä tayanıp, kiräkle çikläwlär kertäbez,”-dide ul.
Bu belderü Awrupa daru agentlığı EMAnıñ vakśina belän qan quyıru arasında bäyläneş barlığın iğ’lan itüennän soñ yasaldı.
Siräk oçrawçı qan quyıru oçraqları Oksford-AstraZeneka vakśinasınıñ barı berençe dozasınnan soñ ğına bula. Anı inde yasatuçılarğa ikençe dozanı da qadatu kiñäş itelä.
