Qurqu mäğaräsendä 6 meñ yıllıq bala skeletı tabıldı

İzrailneñ kön’yaq-könbatışında Üle diñgez yar buyında Yähüdiyä çülendäge Qurqu mäğaräsendä 6 meñ yıllıq bala skeletı tabıldı. Anıñ 6-12 yäş’lär arasında ülüe häm qız buluı farazlana.

“Qurqu mäğaräse” üzeneñ can öşetkeç isemen 1960nçı yıllarda anda tabılğan keşe skeletlarınnan ala. Söyäklärneñ Rim imperatorlığına qarşı baş kütärgän yähüdlärneke ikäne açıqlandı. Bu miladtan soñ 132-135nçe yıllar arasında bulğan Bar Koxba fetnäse waqıtında açlıqtan ülgän keşelär bulıp çıqtı.

Rim imperatorlığı tarafınnan bastırılğan baş kütärüdä, qayber çığanaqlarğa qarağanda, 500 meñnän artıq yähüd üterelä häm tağın küpmeseder töbäktän sörelä.

Qurqu mäğaräsendä izge yazulı törgäklär dä tabılğan ide. Menä xäzer 6 meñ yıllıq bala skeletı çıqtı. Ul mumiyağa äwerelgän xäldä. Anıñ öleşçä tirese, çäçe häm señerläre saqlanğan.