Fälästin milli dialog söyläşüläre başlıy

Fälästin milli dialog söyläşüläreneñ yaña turı 16nçı-17nçe martta ütkäreläçäk

1595378
Fälästin milli dialog söyläşüläre başlıy

Däwlät televideniyäsenä äñgämä birgän “Fätih xäräkäte” üzäk komitetı ğomum särkätibe Cibril är-Rucub säyäsi ayırımlılıqnı beterüneñ häm urtaqlıq tözüneñ strategik saylap alu buluın belderde.

Qahirädä uzdırılaçaq yaña tur söyläşülär öçen 16nçı-17nçe mart könnäreneñ bilgelänelüen citkerüçe Rucub monnan aldağı cıyılışta Fälästin törkemnäreneñ barısınıñ da qatnaşuına iğ’tibar yünältte.

"Berkem dä saylawğa kirtä bula almayaçaq. Demokratik barış başladı häm berkem dä anı tuqtata almayaçaq", - dip äytüçe Rucub irekneñ üsterelüenä qağılışlı ilbaşı qararnamäse nigezendä "oyışmağa qağılışlı säbäplär belän säyäsi qulğa alular, çaqırular häm mäxkämä barışları” dos’yeseneñ 5-6-7nçe martta yabılaçağın belderde.

Fälästin törkemnäre 7nçe-8nçe fevral’dä uzdırğan milli dialog söyläşülärendä kileşüne häm Fälästin ğomum saylaw barışın tikşergän ide.

Fälästin İlbaşı Mäxmüd Abbas 22nçe mayda xalıq ışanıçlıları, 31nçe iyül’dä Däwlät başlığı häm 31nçe avgustta Fälästin Milli şura saylawlarınıñ ütkärelüen küzdä totuçı qararnamägä ğinwar’ ayında qul quyğan ide.

Fälästindä 2006nçı yılğı saylawnı ciñgän “Hamas”nıñ Ğazzä sızığında citäkçelekkä kilgän 2007nçe yıldan birle “Hamas” häm “Fätih” xäräkätläre arasında zur säyäsi büleneş bar.

Aradan uzğan 14 yılda ike xäräkät arasında küp sanda kileşü imzalandı, läkin kilep çıqqan bertörkem kileşmäwçänleklär arqasında bolar tormışqa aşırıla alınmadı.



Bäyläneşle xäbärlär