Prinś Garri: "Britaniya matbuğatı minem psixikamnı bozdı"

Böyekbritaniya patşalığınnan Sasseks gerśoğı prinś Garri xatını Megan Markl belän AQŞta yäşi başlawlarınıñ säbäpçese itep ingliz matbuğatın atadı. Ul medianıñ üzeneñ ruxi sawlığın qaqşatuın belderde. “Här ir häm äti êşlärgä tiyeşle bulğannı êşlädem. Ğailämne ağulı moxittän alıp kitärgä mäcbür qaldım,”-dide ul.

Prinś Garri patşa ğailäse turında bäyan itüçe “The Crown” (Tac) serialı xaqında da äytte. Ul kartinada kürsätelgännärneñ, töp-tögäl ük bulmasa da, patşa sarayındağı tormış xaqında döres fiker tudıruın citkerä. Äytüençä, serialdağı prinś aña, sarı matbuğatta tasvirlanğannan, kübräk oxşağan.   

Prinś Garri ber televideniye tapşıruında patşa ğailäsendäge yuğarı däräcäle wazıyfalarına kire qaytmaw niyäteneñ nıqlı buluın citkerde. Anıñ här adımı Angliya matbuğatı tarafınnan centekläp küzätelep bara. Mediada ul bik küp tapqır “patşa ğailäseneñ tıñlawsız balası” bularaq taswirlandı. Ğomeren aktrisa Megan Markl belän bäyläwe massaküläm mäğ’lümat çaralarına tağın da kübräk material birde. Xatınınıñ êlegräk kiyäwgä çığıp ayırıluı, äniseneñ qara tänle buluı häm sänğat’ belän bäyle tormışı äle xaman matbuğatta zur qızıqsınu uyatuçı temalar.

Änise prinśessa Diananı 1997nçe yılda jurnalistlardan qaçqanda oçrağan yul hälakätendä yuğaltqan prinśnıñ Angliya mediası belän yaxşı mönäsäbättä bulmawı küptän bilgele.