Фәкыйрь илләргә вакцина таратылачак / Fäqir illärgä vakśina taratılaçaq

Global’ vakśina häm vakśinaśiyäläw berlege (GAVI) “Kovid-19” vakśinaları global’ ireşü programması (COVAX) qısalarında 2021nçe yılnıñ berençe 6 ayında yarlı illär öçen kim digändä 337 million doza “Kovid-19” vakśinasınıñ ayırılıp quyılaçağın belderde.

Bötendönya sälamätlek saqlaw oyışması Global’ vakśina häm vakśinaśiyäläw berlege häm Kizü xastalıqlarına äzerlek öçen yañarış koaliśiyası alıp barğan urtaq iniśiativa belän 2020nçe yılnıñ aprel’ ayında “Kovid-19” vakśinaları global’ ireşü programması çarası başlatılğan ide.

Xäzergä çaqlı 190 il qatnaşqan şuşı programma belän “Kovid-19” vakśinalarınıñ dönyanıñ iñ fäqıyr’ 92 ilenä tigez, tiz häm ğadel itep taratıluı maqsat itelde.

Global’ vakśina häm vakśinaśiyäläw berlegennän yasalğan yazma belderüdä vakśinalarnıñ taratıluına qağılışlı waqıtlı plan açıqlandı.

Monıñ nigezendä, 337 million 200 meñ doza “Kovid-19” vakśinasınıñ yarlı illärgä fevral’ axırınnan başlap taratıluınıñ kötelüe assızıqlandı.

Belderüdä yaqınça 145 fäqıyr’ ildä xalıq sanınıñ 3,3%ınıñ bıyıl yıl urtasına xätle vakśinaśiyäläwneñ maqsat itelüe citkerelde.

Planğa kürä, illärgä xalıq sannarına qarap vakśina ayırılıp quyılaçaq.

Hindstanğa 97 million 200 meñ, Paqıstanğa 17 million 200 meñ, Nigeriyağa 16 million, İndoneziyağa 13 million 700 meñ, Bangladeşqa 12 million 800 meñ, Braziliyağa 10 million 600 meñ, Keniyağa 4 million 200 meñ, Sudanğa 3 million 400 meñ, Yemengä 2 million 300 meñ häm Süriyägä 1 million 20 meñ doza “Kovid-19” vakśinasınıñ bireläçäge belderelde.