Köndez çerem itep alunıñ faydaları

Köndezge yoqı zihenne nığıta.  “United Press International”nıñ xäbärenä qarağanda, Qıtaynıñ Şanxay aqıl sälamätlege üzäge belgeçläre monıñ belän bäyle tikşerenülär alıp barğan.  Anda Pekin, Şanxay häm Şian şähärlärendä yäşäwçe 2 meñ 200 keşe küzätelä.

Tikşerelüçelärneñ 1520se köndez 2 säğat’tän azraq yoqlap ala, 680 keşe isä bötenläy yatmıy. Soñınnan alar vizual’-kiñlek ostalığı, qısqa waqıtlı xäter, iğ’tibar aralığı, problema çişü, urınnı añlaw häm yögerek söyläşü şikelle testlar aşa uza.

Tikşerenü törkemeneñ citäkçese Lin San beldergänçä, köndez yoqlap aluçılar xäter häm yögerek söyläşü ostalığında, yoqlamawçılar belän çağıştırğanda, citdi ayırma kürsätä. 

Amerika Quşma Ştatlarınıñ N’yu-York şähärendäge Lenoks Xill xastaxanäsendä neyrolog Gayatri Nevi sälamät yoqını ğadätkä kertüneñ demenśiyädän saqlawın belderde. Ul bu mäs’äläne tağın da nığraq tikşerergä kiräklegen uylıy.

Belgeçlär, monnan tış, köndezge yoqınıñ waqıtı häm yışlığınıñ aqıl mömkinlekläre nisbätennän ähämiyätle buluın alğa sörä.